Lucis largitor candide,
Cujus sereno lumine,
Post lapsa noctis tempora,
Dies refusus panditur.
Tu verus mundi Lucifer,
Non is, qui parvi sideris
Venturæ lucis nuntius,
Angusto fulget lumine.
Sed toto cœlo clarior,
Lux ipse totus et dies,
Interna nostri pectoris
Illuminans præcordia.
Adesto rerum Conditor,
Paternæ lucis gloria,
Cujus admota gratia,
Nostra patescunt pectora.
Tuoque plena spiritu
Secum Deum gestantia,
Ne repientis perfidi
Diris patescant fraudibus.
Ut inter actus seculi
Vitæ quod usus exigat,
Omni carentes crimine,
Tuis vivamus legibus.
Probrosas mentis castitas
Carnis vincat libidines,
Sanctumque puri corporis
Delubrum servet spiritus.
Hæc spes precantis animæ,
Hæc sunt votiva munera,
Ut matutina nobis sit
Lux in noctis custodiam.
