Vivat JESUS et MARIA
Certa cunctis coeli via: CHRISTO Deo, laudis thus; Mundo ficus, ulcus, pus.
CHRISTUS fixus est in ligno:
Mundus totus in maligno. CHRISTO Deo, laudis thus; Mundo ficus, ulcus, pus;
Quaeris, quid sit hicce orbis?
Plena arca flagris, morbis: DEUS meus omnia! Cuncta mundi somnia.
Pompa mundi, o amici!
Ramus stultus, arbor fici: DEUS meus omnia! Cuncta mundi somnia.
Mundus totus, parvum punctum,
Sed millenis malis junctum. DEUS meus omnia! Cuncta mundi somnia.
Mare iactat mundi bullam
Ebibit mors ut ampullam, DEUS meus omnia! Cuncta mundi somnia.
Bella, livor, rixae luxus
Hujus maris sunt refluxus JESUS, CHRISTUS, MARIA Veri boni maria.
Mundus cordis uncus, hamus,
Stulto voto hunc captamus
JESUS, CHRISTUS, MARIA, Veri boni maria.
Basiat cor in amplexu
Sed occidit doli nexu JESUS, CHRISTUS, MARIA, Veri boni maria.
Ore promit centum laudes,
Corde vomit mille fraudes JESUS, CHRISTUS, MARIA, Veri boni maria.
Mundus paret gloriosus,
Qui globosus, hic gibosus JESUS, CHRISTUS, MARIA, Veri boni maria.
Quid est faeda mundi larva?
Nisi mica, resque parva JESUS, CHRISTUS, MARIA, Nostra sunto gaudia
Terra tristis et afflicta
Ob defectus et delicta JESUS, CHRISTUS, MARIA, Nostra sunto gaudia
Pauper casa, dives fumo
Flos ut rosa plena dumo. JESUS, CHRISTUS, MARIA, Nostra sunto gaudia.
Orbis, morbus ceu caducus,
Spumat, humat ejus fucus: JESUS, CHRISTUS, MARIA, Nostra sunto gaudia.
Fama orbis ficta Iris,
Color pictus nugis miris. JESUS, CHRISTUS, MARIA, Nostra sunto gaudia.
Tot laborum hic munera,
Tot sudorum sunt funera
JESUS, CHRISTUS, MARIA, Nostra sunto gaudia.
Tota forma gaudiorum
Ferre vultum otiorum, JESUS, CHRISTUS, MARIA, Nostra sunto gaudia.
Hic jocari, hic saltare,
Nil aeterna procurare: JESUS, CHRISTUS, MARIA, Nostra sunto gaudia.
Quasi homo non sit cinis
Nec pateret rerum finis JESUS, CHRISTUS, MARIA, Nostra sunto gaudia.
Sed dum caput nixum collo,
Ocellos in Coellum tollo; Caeli pompa, pomparum! Mundus nuga nugarum.
